SEGARA
RUPEK
Kacrita wenten kocap
pandita mapesengan Mpu Sidhimantra saking Jawi Kangin masuitra ring ula ageng
sane mawasta Naga Basuki. Ula ageng punika magenah ring gua ageng Besakih sane
magenah ring bongkol Gunung Agung. Mpu sidhimantra punika masamaya maktayang
Sang Naga Basuki ajeng-ajengan marupa madu, susu, miwah mentega.
Risedek dina anu Ida Mpu Sidhimantra
keni panyungkan, raris kanikayang putranidane makta ajeng-ajengan punika. putra
sane kanikayang mapesengan Ida Manik Angkeran. Ida Manik Angkeran ngambil
gentan ajinidane saking nyilib tur genta punika kabakta ka Besakih. Ring
Besakih Ida raris nyuarayang gentane, mawastu Sang Naga Basuki medal saking
guane. Ida Manik Angkeran raris nguningayang sapangrauh idane tur ngaturang
ajeng-ajengan punika. Naga Basuki raris nakenin Ida Manik Angkeran, napi sane
pacang kapekayunin anggen bekel ka Jawi. Ida Manik Angkeran nenten mapakayunan
napi tur ngaturin Sang Naga Basuki gelis-gelis ngranjing ring guane.
Daweg Sang Naga Basuki ngranjing
ring guane raris kapanggih bongkol ikuh danene madaging soca. Soca punika raris
kaplaibang santukan meled pisan pacang kanggen kemulan maklecan. Sang Naga
Basuki raris nguber tur nyilapin lad paenjekan Ida Manik angkeran, sane
ngranayang Ida Manik Angkeran seda ring alas cemarane, tur alas punika mangkin
kawastanin alas Cemara Geseng.
Mpu Sidhimantra sue nyantos putrane
nenten rauh, raris kapanggih gentanidane ical. irika Ida raris mapekayun janten
putrane nemu sengkala. Ida raris gelis lunga ka Besakih matemu Sang Naga Basuki
nakenang indike puniki. Sang Naga Basuki raris nyritayang parisolah putranidane
ring alas Cemara Geseng. Mpu Sidhimantra raris nunas ampura mangda putranida
prasida mawali nyeneng. Yen sampun nyeneng pacang kaserahang ring Sang Naga
Basuki ngaula irika. punika mawinan Ida Manik Angkeran nyeneng malih tur
manggeh magenah ring Bali dados mangku ring Besakih turun-tumurun ngantos
mangkin.
Mangda Ida Manik Angkeran nenten
malih mawali ka Jawi, raris Mpu Sidhimantra ngoresang dandanidane ring genah
sane cupek sadaweg Ida mawali malih ka Jawi. Genah punika raris dados segara
sane mawasta Segara Rupek. Punika mawinan gumi Bali mabelasan ring gumi
Jawane.
Kaketus
saking : Puspa Negara II, 1987
Tidak ada komentar:
Posting Komentar